Satua I UBUH

Wenten jadma alit matuuh bau kutus tiban, tan wenten ipun uning ring desanipun, miwah reramanipun. Irika ring jagat jembrana. Mailehan ipun nongos, sapasira kemanten sane nyak ngajak, irika ipun numpang, madan I Ubuh. wenten sane maosang, kocap bapan ipun maparab Pan Kadar saking Tabanan, wireh jaga kapademang antuk Cokorda Tabanan, kaaranin mamaling nyuh druenida

            Punika awinan ipun rauh ka jagat Jembrana sareng kurenanipun. Ring Jembrana ipun ngelah pianak asiki, sane mawasta I Ubuh. Pan Kadar ipun padem keni gering rauhing sane luh. I Ubuh punika lintang rajin ipun, malih uning ring dewek lacur. Asing wenten madue karya weratan, marika ipun nulungin, nanging ipun seringan ring pasar, nulungin nongosin padagangan, ngajangin padagangan. Wenten jadma luh ma-dolan nyraki, mapungkusan Men Jedog, magenah ring desa Batuagung Negara Jembrana. Ipun balu malih tan ngelah pianak. Ipun Men Jedog lintang kapiolas ring I Ubuh, raris kaduduk kaanggen pianak. Di sampune ipun nuduk punika, raris ipun magentos adan, mapungkusan Men Bagia, pianakipun kawastanin I Bagia.

            Sedek punika ring Jembrana, bau wenten bangsa cina wantah asiki, dados sudagar ageng. Antuk wastan ipun sane sajati tan wenten sane uning, sakewanten ipun kakaukin I Babah. Men Bagia punika sering-sering ngambil dagangan ring Cinane punika. Cinane punika uning ring indik Men Bagia polih nuduk pianak tur sukainipun raris kajak ring tokonipun madagang. Semengan I Ubuh nulungin Cinane madagang, sorene nulungin memenipun ngajangin padagangan makta budal.

            Asapunika gawenipun I Bagia, malihne lintang jemet, tan pesan purun nglengitang dagangan. Cinane punika sayang pisan ring I Bagia, ajahina nulis miwah maitung-itungan. I Bagia gelis ngresep napi luir ajahina antuk Cinane pinika tan naen ipun ngengsapang jantos ipun uning nulis tur ngitung. Sampun I Bagia matuuh roras tiban, anggena juru tulis antuk I Babah, gajiha duang dasa rupiah. Memenipun kadi dulurin sayang ring pianak. Malih dagangan ipun sayan ngagengang kentugin antuk Cinane punika.

            Sue-sue ngantos I bagia Magajih telung dasa rupiah, maliha ipun sampun sedeng makurenan, memene nyadia makurenang pianakne, wireh ajerih manahne yan kagoda antuk jadma luh sane tan patut tingkahne. I Bagia ngidepang pangidih memene, nanging ipun ngidih jadma sane mawasta Ni Kasih, panak kaponakan ipun Men Bagia.

            Masaut memenipun, “idong, bes keto bocok goban Ni Kasihe, tusing pantes cai matimpal teken ia, meme ngedalem ngenot”. Masaut I Bagia, “Wireh icang merasa teken dewek lacur, yan icang ngalih anak jegeg, sinah kayang kenehne jegeg, tusing ada anggon icang nuukin. Yadiapin Ni Kasih bocok, yen kenehne melah, dagingnyane enu masih melahan teken ane jegeg.”

            Duaning asapunika munyinipun. Kapineh patut antuk memenipun, raris Ni Kasih raosin ipun. Wantah ping kalih ipun ngraosin Ni Kasih suba kaidepang. Di sampune puput I Bagia matemu ring Ni Kasih, memenipun tan mari lega nyetne, wireh adung ipun makurenan, sami-sami ipun demen ngalih gae, tur dagangan ipun sayan ngagengang kemanten, nyantos nyidayang I Bagia ngawe toko padewekan ipun. Sue-sue ipun dados sudagar ageng. Puput.